يا نهار مش فايت !!!!

خير بداية الكلام هو السلام
السلام عليكم و رحمة الله و بركاته

********### يا نهار لن يعود يعنى كده أنا أكيد هخش النار مافيش كلام و مش هاورد على جنه أبداً ###********

....-- الكلام دا انت هتقوله فى عقل بالك وانت بتقرا المقال، عشان كده أرجوك اقراه للآخر...ماتخافش مش هياخد منك أكتر من ثلاث دقايق بس..

#%#%((( ماتكسلش و تقول ماعنديش وقت )))%#%#


واسمحولى اتكلم بالعربى بتاع الشارع عادى زى الناس يعنى..


للأسف يا جماعه دلوقتى الواحد بقى يمشى فى الشارع أو راكب المواصلات أو قاعد فى البلكونه....إلخ... و يسمع الشتيمه بصوت عالى و عينى عينك من غير كسوف والناس ترد على بعضها ، وانت تتخيل فى الأول انها خناقه أو مشكله بين مجموعه من الناس مثلا...

للأسف هتكتشف بعد ثوانى ان الموضوع كله عباره عن شوية ناس ماعندهمش أخلاق و لا حياء و لا ذوق و الحكايه كلها انهم بيهظروا مع بعض و مبسوطين جداً بكده ولما واحد يشتم التانى و يقوله يابن الكذاااااا والتانى بكل سهوله و خفة دم يرد عليه و يقوله يابن الكذااااا ياللى أمك كذااااا...---طبعاً كلكم فاهمين قصدى من كلمة الكذاااااا--- (((على فكره يا جماعه هو دا اللى اسمه قذف المحصنات اللى موجود فى القرءان و فى الأحاديث واحنا معظمنا مش فاهم معناه)))...طيب نكمل كلامنا....

و يقعد يشتم فى كل أهله اللى عايشين واللى ماتوا كمان والناس الكبار اللى حواليهم واقفين ساكتين ... مافيش حد فيهم بيقول يا واد عيب كده... يا راجل اختشى فى ستات واقفه فى الشارع ... يابنى اتقى الله.. ربنا هايحاسبك على كل حرف بيطلع من لسانك......

و حتى لو حد اتكلم وقالهم عيب ...برضو مافيش فايده هما مبسوطين كده و مش مهم بقى الأخلاق والدين و آداب الطريق والحاجات اللى مش مهمه دى..ولا حياة لمن تنادى...

والمصيبه انهم ساعات يقعدوا يشتموا فى بعض كده و فى الآخر تتحول الشتيمه لخناقه و ممكن يرفعوا المطاوى على بعض و يموّتوا بعض كمان و مش مهم ان حد فيهم يموت و التانى يخش السجن..عادى خالص..


و لما تيجى تعاتب واحد فيهم و تقوله عيب كده مايصحش..يرد عليك بكل بجاحه و يقوللك مالكش دعوه خلليك فى حالك--طبعاً دا بعد مايشتمك انت شخصياً--.. ولو كان صاحبك وحبيبك هايرد عليك و يقوللك يابنى هى دى الصياعه خلليك واد جرئ كده و مخربش و مايهمكش حد و بعدين يا عم الناس كلها بقت كده...يعنى هى جات علينا احنا....إلخ

طيب دلوقتى ياجماعه احنا اتكلمنا أو هاجمنا الناس اللى اتعودوا على السلوك دا من الناحيه الاجتماعيه... طيب ممكن اقول كلمتين صغيرين بقى من الناحيه الدينيه -- إذا ماكانش عندكوا مانع يعنى -- طيب متشكر


يعنى ينفع برضه لما تشتم واحده و تتهمها بإنها فاحشه أو زانيه أو....
طيب نشوف القرءان بيقول ايه..

قال الله تبارك و تعالى.. ( إن الذين يرمون المحصنات الغافلات المؤمنات لُعنوا فى الدنيا و الآخرة و لهم عذاب عظيم -23- يوم تشهد عليهم ألسنتهم و أيديهم و أرجلهم بما كانوا يعملون -24- ) -سورة النور ..

وقال تعالى.. ( والذين يرمون المحصنات ثم لم يأتوا بأربعة شهداء فاجلدوهم ثمانين جلدة و لا تقبلوا لهم شهادةً أبدا و أولئك هم الفاسقون -4- )سورة النور

ربنا عز و جل بيقولنا فى الآيتين دول إن اللى بيشتم واحده ست و يقولها يا زانيه أو يا باغيه أو يا كذااااا- فاهمين طبعاً- أو يقول لواحد بهزار أو بجد.. يابن الزانيه أو يا بن الكذاااا-فاهمين برضو-.. دا يبقى ملعون فى الدنيا و الآخره و له عذاب عظيم، و عليه فى الدنيا الحد ثمانون جلده و الشهاده بتاعته مايتاخدش بيها حتى لو كانت بالحق و العدل..

طيب تعالوا نشوف الرسول الكريم محمد( صلى الله عليه و سلم ) قال ايه..قال ( اجتنبوا السبع الموبقات...) و ذكر منها قذف المحصنات..

طبعاً فى ناس متصورين القذف يعنى انك تقذف واحد بالطوب أو القذف بالصواريخ أو قذيفه من قدم رونالدينهو وتخترق الشباك ياااااااااااااه جوووووووووول....لا لا لا لا يا جماعه مش هو ده القذف اللى فى القرءان...

القذف معناه انك تشتم و تقول لامرأه يا زانيه أو أو أو ...أو تقول لزوجها يا زوج الزانيه أو أو أو... أو تقول لابنها أو بنتها يا بنت الزانيه أو يابن الباغيه أو يابن الكذاااا- طبعاً فاهمينها - ...

عشان كده الرسول(ص) قال: ( إن الرجل ليتكلم بالكلمه ما يتبين فيها يزل بها فى النار أبعد مما بين المشرق و المغرب... فقال له معاذ بن جبل(رضى الله عنه) يا رسول الله و إنا لمؤاخذون بما نتكلم به ؟؟ فقال الرسول الكريم (ص): ثكلتك أمك يا معاذ ، و هل يكب الناس فى النار على وجوههم إلا حصائد ألسنتهم؟)..

و فى حديث آخر من كان يؤمن بالله و اليوم الآخر فليقل خيراً أو ليصمت) طبعاً كلنا عارفين الحديث دا كويس و بنسمعه فى كل حته فى الجوامع و المدارس والتليفزيون والراديو ....إلخ

بس للأسف مش بنركز في معناه و نعرف أد إيه حديث فى منتهى الخطوره.. يا جماعه الحديث بكل بساطه و على أد فهمى يعنى.. إن الإنسان اللى على طول لسانه بيطلع كلام وحش و كله شتيمه فى فلان و علانه دا يبقى إنسان غير مؤمن بوجود ربنا أصلا و غير مؤمن كمان بإن فى يوم اسمه يوم القيامه هنتحاسب كلنا فيه.. يوم لا ينفع المرء مال ولا بنون إلا من أتى الله بقلب سليم .. و ربنا سبحانه و تعالى قال.. ما يلفظ من قولٍ إلا لديه رقيب عتيد..


و فى أحاديث كتيره يا جماعه على الأخلاق و شرور اللسان وكده بس مش هينفع اكتبها كلها عشان ماتزهقوش من طول الموضوع...


********### طبعاً دلوقتى كل الناس بيقولوا يا نهار اسود يعنى كده أنا أكيد هخش النار مافيش كلام....

لا يا جماعه ربنا سبحانه و تعالى هو العفو الغفور الرحيم و هو أكرم الأكرمين و رحمته واسعه جداً و بيقبل التوبه من كل الذنوب بس احنا نسارع بالتوبه قبل فوات الأوان عشان يا جماعه الموت مالوش معاد و بييجى فجأه.. ###**********

طيب انا هقولكم على حاجه تانيه قبل ما أخلص ..كام رساله صغيره كده فى الكام سطر اللى جايين دول..

بسم الله الرحمن الرحيم...( قل ياعبادي الذين أسرفوا على أنفسهم لاتقنطوا من رحمة الله إن الله يغفر الذنوب جميعاً إنه هو الغفور الرحيم ).....من منَّا لا يُخطئ...من منًّا لا يُذنب...من منَّا لا يقع في المعاصي...كثرت ذنوبنا وأثقلت ظهورنا..نسبُّ هذا، ونقذف هذا، ونضرب هذا، ونجاهر ونفتخر بالمعاصي، وطالما فرَّطنا في جنب الله تعالى....ينزل جل وعلا إلى السماء الدنيا في الثلث الأخير من الليل ويقول: هل من مستغفرٍ فأغفر له، هل من تائبٍ فأقبله، هل من سائلٍ فأعطيه مسألته، ونحن في غفلة غارقون في ذنوبنا...أفيقوا أيها المسلمون...بادروا بالتوبه فالموت يأتى فجأه

عندما تولد يابن آدم يؤذّن فى أذنك من غير صلاة.. وعندما تموت يُصلّى عليك من غير أذان.. وكأن حياتك فى الدنيا وقت تقضية بين أذان وإقامه.... فلا تقضيها فيما لا يرضى الله

يقول الله عز وجل فى حديث قدسى: يا عبادي إن كنتم تعتقدون أنى لا أراكم، فذاك نقص فى إيمانكم..وإن كنتم تعتقدون أنى أراكم، فلم جعلتمونى أهون الناظرين إليكم؟!


كان نفسى اكتب اكتر من كده والله..... بس مش عايز حد يتضايق من طول الموضوع رغم إنى حاسس إنى فعلا طولت فيه.. بس أرجوكم سامحونى واعذرونى..

ملحوظه مهمه يا جماعه.....أنا مش شيخ و لا عالم فى الدين ولا حاجه...بس أنا واحد من الناس فعلاً حزين جداً على الحال اللى وصلنا ليه...يعنى الخطأ وارد ... و ياريت لو أى حد عنده تعليق أو نقد أو شايف أى غلطه فى الموضوع..يرد عليا..
و ربنا يجازيه خير لو يعرفنى الصح من الغلط

و أخيراً لو كنت اتوفقت يبقى بتوفيق من عند ربنا... و لو كنت أخطأت يبقى منى و من الشيطان

سبحانك اللهم ربنا و بحمدك لا إله إلا أنت أستغفرك و أتوب إليك .. و صلى اللهم و سلم و بارك على محمد و على آله و صحبه و من تبع هداه بإحسانٍ إلى يوم الدين
منقول